အခြေခံပညာ နဝမတန်းကျောင်းတွင်းစစ် စာမေးပွဲများနှင့် အတန်းအသီးသီး၏ စာမေးပွဲကာလသတ်မှတ် ကျင်းပသွားမည့် အစီအစဉ်ထုတ်ပြန်

၂၀၁၇-၂၀၁၈ ပညာသင်နှစ်၊ အခြေခံပညာ နဝမတန်းကျောင်းတွင်းစစ် (ပြင်ပဖြေ) စာမေးပွဲတွေနဲ့ အတန်းအသီးသီးရဲ့ စာမေးပွဲ ကာလသတ်မှတ်ခြင်းနဲ့ အောင်စာရင်း ထုတ်ပြန်ခြင်းတို့ ကျင်းပသွားမယ့် အစီအစဉ်တစ်ရပ်ကို ပညာရေးဝန်ကြီးဌာနက ထုတ်ပြန်ထားပါတယ်။

စတုတ္ထတန်း (Grade-5) နဲ့ အဋ္ဌမတန်း (Grade-9) စာမေးပွဲတွေကို ဖေဖော်ဝါရီလ ၁၉ ရက် မှ ၂၆ ရက် အတွင်း ကျင်းပသွားရန် ဖြစ်တယ်လို့ သိရပါတယ်။ ကျန်ရှိတဲ့ကျောင်းတွင်းစစ် စာမေးပွဲတွေကို ဖေဖော်ဝါရီလ ၇ ရက်မှ ၁၆ ရက်အတွင်း ကျင်းပရန်နှင့် ၂၀၁၈ ခုနစ် တက္ကသိုလ်ဝင်စာမေးပွဲကို မတ်လ ၇ ရက်မှ ၁၆ ရက်အတွင်း ကျင်းပပြုလုပ်သွားမှာ ဖြစ်တယ်လို့ သိရပါတယ်။ ချင်းပြည်နယ်တွင် ချင်းအမျိုးသားနေ့ ပိတ်ရက်တွေနဲ့ တိုက်ဆိုင်နေတဲ့ ဘာသာရပ်အတွက် ခရိုင်နဲ့ မြို့နယ်အလိုက် စတုတ္ထတန်း၊ အဋ္ဌမတန်း စာမေးပွဲတွေကို သတ်မှတ်စာမေးပွဲ ကာလနောက်တစ်ရက်သို့ ပြည်နယ်ပညာရေးမှူး အစီအစဉ်ဖြင့် ပြောင်းရွှေ့သတ်မှတ် စစ်ဆေးသွားမယ်လို့ သိရပါတယ်။ မူလတန်းအောက်ဆင့် သင်ရိုးသစ် ပထမတန်း (Grade-1) တွင် စာသင်ခန်းအတွင်း ပုံမှန်ပြုလုပ်တဲ့ စစ်ဆေးအကဲဖြတ်ခြင်း ပြုလုပ်ရန်နဲ့ ရရှိတဲ့ အချက်အလက်တွေကို အသုံးပြုပြီး သင်ယူပြီး စစ်ဆေးအကဲဖြတ်ခြင်း (Summative Assessment) အနေနဲ့ တစ်နှစ် ၂ ကြိမ် ပြုလုပ်ရန်ဖြစ်ပါတယ်။ မြန်မာစာအရေးအဖတ်နဲ့ သင်္ချာတက်မြောက်မှုကို စစ်ဆေးအကဲဖြတ်ရန် ဖြစ်ပါတယ်။

မူလတန်းအောက်ဆင့် သင်ရိုးဟောင်း ဒုတိယတန်း (Grade-3)၊ မူလတန်း အထက်ဆင့် တတိယတန်း (Grade-4)၊ အလယ်တန်း အဆင့် သင်ရိုးဟောင်း ပဉ္စမတန်း (Grade-6)၊ ဆဋ္ဌ မတန်း (Grade-7) နဲ့ သတ္တမတန်း(Grade-8) တွင် နှစ်ဆုံးစစ်ဆေးခြင်းကို ဖေဖော်ဝါရီလ ၇ ရက်မှ ၁၆ ရက် အတွင်း တစ်ရက်လျှင် တစ်ဘာသာစီ ဘာသာရပ်တစ်ခုလျှင် စာသင်ချိန်တစ်ချိန်နှုန်း စစ်ဆေးရန်ဖြစ်ပါတယ်။ အထက်တန်းအဆင့် သင်ရိုးဟောင်း နဝမတန်း (Grade-10) အတွက် နှစ်ဆုံးစစ်ဆေးခြင်းကို ဖေဖော်ဝါရီလ ၇ ရက်မှ ၁၆ ရက်အတွင်း ဘာသာရပ်တစ်ခုလျှင် ဖြေဆိုချိန် ၂ နာရီ သတ်မှတ်စစ်ဆေးရန်၊ အထက်တန်းအဆင့် သင်ရိုးဟောင်း ဒသမတန်း (Grade-11) အတွက် နှစ်ဆုံးစစ်ဆေးခြင်းကို ဖေဖော်ဝါရီလ ၇ ရက်မှ ၁၆ ရက်အတွင်း ဘာသာရပ်တစ်ခုလျှင် ဖြေဆိုချိန် ၃ နာရီသတ်မှတ်ပြီး စစ်ဆေးသွားမယ်လို့ သိရပါတယ်။ ဒသမတန်း (Grade-11) တွင်နှစ်ဆုံးစစ်ဆေးခြင်းကို အခြေခံပညာ ပြီးမြောက်မှ စစ်ဆေးရန်ဖြစ်တယ်လို့ ထုတ်ပြန်ချက်အရ သိရပါတယ်။

-ဝေဝေ