အခြေခံဆက်သွယ်ရေးလိုအပ်ချက် ဖြည့်ဆည်းပေးနိုင်ရေးအတွက် အစီအစဉ်သုံးခုဖြင့် အကောင်အထည် ဖော်မည်

ပြည်သူလူထုရဲ့အခြေခံဆက်သွယ်ရေး လိုအပ်ချက်တွေကို ဖြည့်ဆည်းပေးနိုင်ရေးအတွက် အစီအစဉ်သုံးခုနဲ့ အကောင်အထည် ဖော်သွားမယ်လို့ အခြေခံဆက်သွယ်ရေး လိုအပ်ချက် ဖြည့်ဆည်းရေး မဟာဗျူဟာ (Universal Service Strategy) မူကြမ်းအပေါ် အကြံပြုဆွေးနွေးပွဲ ကျင်းပခြင်း သတင်းထုတ်ပြန်ချက်ကနေ သိရပါတယ်။

အဲဒီအစီအစဉ်တွေကတော့ (၁) အခြေခံဖုန်းခေါ်ဆိုမှုနဲ့ မြန်နှုန်းမြင့် အင်တာနက် ဆက်သွယ်ရေးအတွက် အခြေခံအဆောက်အဦတွေ တည်ဆောက်ခြင်း (၂) ဒစ်ဂျစ်တယ်အနာဂတ်ကို အထောက်အကူဖြစ်စေဖို့ မြန်နှုန်းမြင့် ဆက်သွယ်မှုစနစ်နဲ့ သတင်းအချက်နှင့် နည်းပညာတွေ အသုံးချနိုင်ရေး သင်တန်းတွေပို့ချပေးခြင်း (၃) ဘာသာစကားမတူညီတဲ့ တိုင်းရင်းသားလူမျိုးစုတွေ၊ လူနည်းစုတွေ၊ ဝင်ငွေနည်းပါးသူတွေ၊ မသန်စွမ်းသူတွေအတွက် အထောက်အကူဖြစ်စေမယ့် အထူးစီမံချက်တွေ ပါဝင်မယ်လို့ သိရပါတယ်။ Universal Service Strategy မူကြမ်းမှာ Universal Service Fund ကို ပထမအဆင့် အနေနဲ့ လိုင်စင်ရ ဆက်သွယ်ရေး အော်ပရေတာတွေရဲ့ ထည့်ဝင်ငွေနဲ့ ထူထောင်သွားဖို့နဲ့ အဲဒီရန်ပုံငွေနဲ့ ဆက်သွယ်ရေး အော်ပရေတာတွေက စီးပွားဖြစ်ဆောင်ရွက်နိုင်ခြင်း မရှိသေးတဲ့ ဒေသတွေ၊ ဝေးလံခေါင်ဖျားတဲ့ ကျေးလက်ဒေသတွေမှာ အခြေခံဆက်သွယ်ရေး ဝန်ဆောင်မှုတွေ ရရှိစေရေး အပါအဝင် အခြား အခြေခံ ဆက်သွယ်ရေးဆိုင်ရာ အစီအစဉ်တွေကို အကောင်အထည်ဖော် ဆောင်ရွက်သွားနိုင်ဖို့ ရေးဆွဲထားရှိတယ်လို့ သိရပါတယ်။

Universal Service Strategy မူကြမ်းကို နိုင်ငံတော်ရဲ့ စီးပွားရေးမူဝါဒ၊ ဆက်သွယ်ရေးဥပဒေ အပါအဝင် တည်ဆဲဥပဒေ နည်းဥပဒေတွေ၊ အိုင်တီယူ၊ ကမ္ဘာ့ဘဏ် အပါအ၀င် အပြည်ပြည်ဆိုင်ရာ အဖွဲ့အစည်းတွေထံက အကောင်းဆုံး အတွေ့အကြုံတွေ၊ ကမ္ဘာ့ဘဏ်ရဲ့ အကူအညီနဲ့ ဆောင်ရွက်နေတဲ့ နိုင်ငံတကာအကြံပေး အဖွဲ့အစည်းတစ်ခုဖြစ်တဲ့ Intelcom ရဲ့အကြံပြုချက်တွေအပေါ် အခြေခံပြီး ပို့ဆောင်ရေးနှင့် ဆက်သွယ်ရေး ဝန်ကြီးဌာန ဆက်သွယ်ရေး ညွှန်ကြားမှုဦးစီးဌာနက ပြုစုရေးဆွဲထားတာ ဖြစ်တယ်လို့ သိရပါတယ်။ မူကြမ်းအပေါ် အကြံပြုဆွေးနွေးပွဲကို ဇန်န၀ါရီ ၂၃ ရက်က ရန်ကုန်မြို့ဆက်သွယ်ရေး သင်တန်းကျောင်းမှာ ကျင်းပခဲ့တာ ဖြစ်တယ်လို့ သိရပါတယ်။

-ထွန်းထွန်း