အများပြည်သူ သွားလာမှု များပြားသော နေရာများတွင် အခမဲ့ Wi-Fi ဇုန်များ တိုးချဲ့လွှင့်တင် ပေးရန်ရှိ

10308771_743503599004958_5032060289481345211_n.jpg

ရန်ကုန်မြို့တွင်း အများပြည်သူ သွားလာမှု များပြားသော နေရာများနှင့် နိုင်ငံခြားသား ဧည့်သည်များ အများဆုံး သွားရောက်သည့် ဗိုလ်ချုပ်ဈေး ကဲ့သို့သော နေရာမျိုးတွင် အခမဲ့ Wi-Fi ဇုန်များကို ပုဂ္ဂလိက အင်တာနက် ဝန်ဆောင်မှု ကုမ္ပဏီတစ်ခုဖြစ်သည့် Red Link Com-munications ကတိုးချဲ့ ထားရှိပေးသွား မည်ဖြစ်ကြောင်း သတင်းရရှိသည်။

အဆိုပါ ကုမ္ပဏီသည် ရန်ကုန်ဘူတာကြီးနှင့် ဗိုလ်ချုပ်ဈေး ကဲ့သို့သော လူစည်ကားသည့် နေရာနှစ်ခုနှင့် ရန်ကုန်တက္ကသိုလ် ဝင်းအတွင်း တိုးချဲ့ပေးသွားမည် ဖြစ်ကြောင်း သိရသည်။

ယင်းကဲ့သို့ အခမဲ့ Wi-Fi ဇုန် များတွင် အသုံးပြုသူများ အနေဖြင့် အီးမေးလ် အသုံးပြုခြင်းနှင့် ဝက်ဘ်ဆိုက်များ ကြည့်ရှုခြင်းကို ပြုလုပ်နိုင်မည်ဖြစ်ပြီး အများပြည်သူ အသုံးပြုနိုင်မည့် အခမဲ့ဧရိယာ ဖြစ်သည့်အတွက် နာရီဝက်တစ်ကြိမ်ခန့် Log out ကျခြင်း ဖြစ်ပေါ်နိုင်ကြောင်း အဆိုပါကုမ္ပဏီ၏ အထွေထွေမန်နေဂျာ ဦးမျိုးမြင့်ညွန့်က ပြောသည်။

Red  Link  Communications အနေဖြင့် ယခုနှစ်မကုန်မီတွင် အခမဲ့ Wi-Fi ဧရိယာသုံးခုကို တိုးချဲ့ပေးသွားရန် စီစဉ်နေပြီး နေရာအချို့အတွက် သက်ဆိုင်ရာဌာနများဖြင့် ညှိနှိုင်းဆွေးနွေး နေရကြောင်း သိရသည်။

ပြည်တွင်းသို့ ကမ္ဘာလှည့် ခရီးသွားများ ဝင်ရောက်မှုမြင့်တက် လာခြင်းနှင့်အတူ အများပြည်သူနှင့် သက်ဆိုင်သော လူစည်ကားသည့် နေရာများတွင် အခမဲ့အင်တာနက် အသုံးပြုနိုင်သည့် ဧရိယာများ နည်းပါးနေသေးပြီး ယခုလတ်တလောတွင် Red Link Communications မှလွှင့်တင်ပေးထားသော အခမဲ့ Wi-Fi ဇုန်များမှာ ရန်ကုန်၊ မန္တလေးနှင့် ပုဂံဒေသ တို့တွင် ခြောက်ခုအထိ ရှိနေပြီဖြစ် ကြောင်းသိရသည်။

-ယုဇနကိုကို