အစိုးရရုံး ဌာနများ eGovernment စနစ်အသုံးပြုမှု တိုးတက်လာစေရန် ကမ္ဘာ့ဘဏ် ကူညီမည်ဟုဆို

ကမ္ဘာ့ဘဏ်သည် အစိုးရရုံး ဌာနများ၏ eGovernment စနစ် အသုံးပြုမှု အခန်းကဏ္ဍကို တိုးတက်လာစေရန်အတွက် ထောက်ပံ့မှု များပြုလုပ်ပေး သွားမည်ဖြစ်ပြီး သင်ကြားရေး အစီအစဉ်များကိုလည်း ကူညီသွားမည်ဖြစ်ကြောင်း ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာနမှ စုံစမ်းသိရသည်။

မြန်မာနိုင်ငံ၏  eGovernment လုပ်ငန်းအောင်မြင်ရန်အတွက် ကမ္ဘာ့ဘဏ် အဖွဲ့အစည်းသည် လုပ်ငန်းသုံးခုကို အဓိက လုပ်ဆောင်ပေး သွားမည်ဖြစ်ကြောင်း အထက်ပါ ဝန်ကြီးဌာနမှ သိရသည်။

ကမ္ဘာ့ဘဏ်သည် ပြည်တွင်း၌ Data Center များတည်ဆောက်ခြင်း၊ National Gateway များတည်ဆောက် ပေးခြင်းတို့ကို အဓိကကူညီ ထောက်ပံ့မှုများ ပေးသွားမည်ဖြစ်ကြောင်း သိရသည်။

ထို့အပြင် ကမ္ဘာ့ဘဏ်အဖွဲ့ အစည်းသည် မြန်မာနိုင်ငံ၏ ဆက်သွယ်ရေးကဏ္ဍနှင့် ပတ်သက်ပြီး တိကျသည့် စံချိန်စံညွှန်းများကို နိုင်ငံတကာကဲ့သို့ သတ်မှတ်ပြ ဋ္ဌာန်းနိုင်ရန်အတွက် ကူညီမှုများ ပေးသွားရန် အစိုးရအဖွဲ့ တာဝန်ရှိသူအချို့နှင့် သဘောတူညီမှုများ ရရှိထားပြီဖြစ်ကြောင်း သိရသည်။

ကမ္ဘာ့ဘဏ်မှ အိုင်စီတီနှင့် ပတ်သက်သည့် ကျွမ်းကျင်ပညာရှင် ပါဝင်သည့် တာဝန်ရှိအဖွဲ့သည် ပြီးခဲ့သည့်နှစ်၊ နိုဝင်ဘာလ နောက်ဆုံးပတ်တွင် မြန်မာနိုင်ငံ ဆက်သွယ်ရေး ကဏ္ဍဖွံ့ဖြိုးရေးအတွက် အစိုးရအဖွဲ့မှ တာဝန်ရှိသူအချို့နှင့် ဆွေးနွေးမှုများ ပြုလုပ်ခဲ့ ပြီးဖြစ်သည်။

မြန်မာနိုင်ငံ၏ နယ်စပ်ဒေသများတွင် ဆက်သွယ်ရေး ဝန်ဆောင်မှုများကို တွင်တွင်ကျယ်ကျယ် အသုံးပြုလာနိုင် စေရန်အတွက်လည်း ကမ္ဘာ့ဘဏ်က ထောက်ပံ့မှုအချို့ ပြုလုပ်ပေးသွားမည်ဖြစ်ပြီး ပြည်တွင်း ဆက်သွယ်ရေး ကဏ္ဍတိုးတက် လာစေရေးနှင့် ပြည်တွင်း၌ အဆင့်မြင့် ဆက်သွယ်ရေး စနစ်နှင့် ဝန်ဆောင်မှုများကို အသုံးပြုနိုင်ရန်အတွက် ယခုကဲ့သို့ အကူအညီ ရယူခြင်းဖြစ်ကြောင်း အထက်ပါ ဝန်ကြီးဌာနမှ တာဝန်ရှိ သူတစ်ဦးက ပြောသည်။

ပြည်တွင်း ဆက်သွယ်ရေးနှင့် ဆက်စပ်လုပ်ငန်းများ ဖွံ့ဖြိုးစေရေးကို အဓိက အကူအညီပေးမည့် ကမ္ဘာ့ဘဏ်၏ အစီအစဉ်တွင် နယ်စပ်ဒေသများတွင် နေထိုင်သူများ အနေဖြင့် မိုဘိုင်းဖုန်း၊ အင်တာနက် အစရှိသည့် ဆက်သွယ်ရေး ဝန်ဆောင်မှုများကို လက်ရှိ အနေအထားထက် ပိုမိုတွင်ကျယ်စွာ အသုံးပြုနိုင်ရမည် ဖြစ်ကြောင်းသိရသည်။

ထို့အပြင် ဆက်သွယ်ရေး ဖွံ့ဖြိုးမှု ပိုမိုလိုအပ်သည့် အဆိုပါ နယ်စပ်ဒေသများတွင် ဆက်သွယ်ရေးဆိုင်ရာ လုပ်ငန်းများကိုလည်း ပိုမိုချဲ့ထွင်မည်ဖြစ်သည်။

-ယုဇနကိုကို