ဘွဲ့လက်မှတ်များ မှန်ကန်မှုရှိမရှိ အွန်လိုင်းမှစစ်ဆေးပေးသည့်စနစ် တက္ကသိုလ် ၆၂ ခုနှင့် ချိတ်ဆက်ပြီး ဖြစ်

တက္ကသိုလ်တွေက ထုတ်ပေးတဲ့ အသိအမှတ်ပြု လက်မှတ်တွေ၊ ဘွဲ့လက်မှတ်တွေကို မှန်ကန်မှုရှိမရှိ အွန်လိုင်းကနေ စစ်ဆေးပေးတဲ့ စနစ်ကို တက္ကသိုလ် ၆၂ ခုနဲ့ ချိတ်ဆက်ပြီးဖြစ်တယ်လို့ သိရပါတယ်။

အဲဒီအွန်လိုင်းကနေ စစ်ဆေးပေးတဲ့စနစ်ဟာ ဝန်ကြီးဌာန ဝက်ဘ်ပေါ်တယ်နဲ့လည်း တစ်ပေါင်းတည်းပူးတွဲ လွှင့်တင်ထားပြီး တက္ကသိုလ် တစ်ခုချင်းစီရဲ့ ဘွဲ့ရကျောင်းသား၊ ကျောင်းသူတွေနဲ့ သက်ဆိုင်တဲ့ Data အချက်အလက်တွေ သိမ်းထားတဲ့ Student Database တစ်ခုစီ ထည့်သွင်းတည်ဆောက် ထားတယ်လို့ သိရပါတယ်။ ကွန်ပျုတာတက္ကသိုလ်နဲ့ နည်းပညာတက္ကသိုလ် စုစုပေါင်း ၆၂ ခုတို့နဲ့အဲဒီစနစ်ကို ချိတ်ဆက်ပြီး ဖြစ်တယ်လို့ သိရပါတယ်။

အဲဒီစနစ်ကို အခြေခံအုတ်မြစ် တစ်ခုအဖြစ်ထားရှိပြီး Student Clearance House Authority စနစ်အဖြစ် နှစ်ရှည်စီမံကိန်းရေးဆွဲပြီး ဘဏ္ဍာနှစ်အလိုက် Phase by Phase အကောင်အထည်ဖော် ဆောင်ရွက်ဖို့ ရည်ရွယ်ထားတယ်လို့ ပညာရေးဝန်ကြီးဌာန စက်မှုနည်းပညာမြှင့်တင်ရေးနှင့် ပူးပေါင်းဆောင်ရွက်ရေး ဦးစီးဌာန၊ အီလက်ထရောနစ် အုပ်ချုပ်ရေးစနစ်နှင့် အိုင်စီတီနည်းပညာ ပူးပေါင်းဆောင်ရွက်ရေးဌာန ကနေ သိရပါတယ်။

Government to Citizen Service (G2C) တစ်ခုဖြစ်ပြီး ချိတ်ဆက်ထားတဲ့ ဝက်ဘ်ဆိုက်လိပ်စာကတော့ cvs.moe-st.gov.mm ဖြစ်ပါတယ်။