ဘဏ် ၂၆ ခုတွင် Core Banking စနစ်များတပ်ဆင်ပြီးဖြစ်

ပြည်တွင်းဘဏ် ၂၆ ခုမှာ Core Banking စနစ် တပ်ဆင်ထားပြီးဖြစ်တယ်လို့ ၂၇.၁၀.၂၀၁၇ ရက် က ကျင်းပတဲ့ ဒုတိယအကြိမ် ပြည်သူ့လွှတ်တော် အစည်းအဝေးကနေ သိရပါတယ်။

e-banking မှာ Internet Banking နဲ့ Mobile Banking ဆိုပြီး နှစ်ခုပါရှိကြောင်း၊ ဘဏ်တွေ အားလုံးက e-banking ဆောင်ရွက်ဖို့ Core Banking စနစ်ရှိရန် လိုအပ်ကြောင်း မြန်မာနိုင်ငံဗဟိုဘဏ် ဒုတိယဥက္ကဌ ဦးဘိုဘိုငယ်ကပြောပါတယ်။ Internet Banking နဲ့ Mobile Banking သုံးမယ်ဆိုရင် ဘဏ်ဖွင့်တဲ့ အချိန်သာမက ၂၄ နာရီပတ်လုံး မိမိစာရင်းကနေ အခြားသူစာရင်းသို့ရွှေ့ခြင်း၊ Bill တွေပေးချေခြင်း၊ Mobile Phone ငွေဖြည့်ခြင်းများ ပြုလုပ်နိုင်မှာဖြစ်တဲ့အတွက် ဘဏ်တွေကို Core Banking စနစ်နဲ့ ဗဟိုဘဏ်ရဲ့ Real Time Gross Settlement System ကို ၂၀၁၆ ခုနှစ်၊ ဇန်နဝါရီလတွင် စတင်ခဲ့တဲ့စနစ်နဲ့ ဆက်လက်ဆောင်ရွက်နေကြောင်း သိရပါတယ်။

e-banking စနစ်တွေဖွံ့ဖြိုးတိုးတက်ဖို့ ၂၀၁၂ ခုနှစ် ဇူလိုင်လမှာ ကတ်နဲ့ ငွေပေးချေမှုဆိုင်ရာအတွက် ညွှန်ကြားချက်၊ ၂၀၁၃ ခုနှစ် ဒီဇင်ဘာလမှာ Mobile Banking နဲ့ပတ်သက်တဲ့ ညွှန်ကြားချက်၊ ၂၀၁၆ ခုနှစ် မတ်လမှာ မိုဘိုင်းငွေကြေးဝန်ဆောင်မှု(Mobile Finacial Services) နဲ့ ပတ်သက်တဲ့ စည်းမျဉ်းတွေကို ထုတ်ခဲ့ကြောင်းပြောကြားခဲ့ပါတယ်။ ဘဏ်များအားလုံး တစ်ပြေးညီအခွင့်အရေး ရှိသည့် e-banking စနစ်အားကောင်းစေရန်ဆောင် ရွက်ပေးရန်အစီအစဉ် ရှိ၊ မရှိ နှင့် စပ်လျဉ်းသည့် မေးခွန်းကိုဖြေကြားခဲ့တာ ဖြစ်ပါတယ်။

-ထွန်းထွန်း