တရားဝင်ခွင့်ပြုချက်မရှိသည့် ဆက်သွယ်ရေး ဝန်ဆောင်မှုကုမ္ပဏီများ ခွင့်ပြုမိန့် လျှောက်ထားရန် ကြေညာ

ဆက်သွယ်ရေးဝန်ဆောင်မှု လိုင်စင်ရ ကုမ္ပဏီအချို့ဟာ ရန်ကုန်မြို့တော် စည်ပင်သာယာရေး ကော်မတီ နယ်နမိတ်အတွင်း တရားဝင်ခွင့်ပြုချက် ရယူခြင်းမရှိဘဲ ဆောင်ရွက်နေတယ်လို စစ်ဆေးတွေ့ရှိရတယ်လို့ သိရပါတယ်။

Fiber Optic Cable နဲ့ ဆက်စပ်ဆက်သွယ်ရေး ကိရိယာတွေ၊ WIfi ချိတ်ဆက်မှု ကိရိယာတွေတပ်ဆင် ချိတ်ဆွဲခြင်းနဲ့ ဆက်သွယ်ရေးတိုင်တွေ စိုက်ထူတာတွေကို တရားဝင်ခွင့်ပြုချက် ရယူခြင်းမရှိဘဲ ဆောင်ရွက်နေတယ်လို့ စစ်ဆေးတွေ့ရှိရတယ်လို့ သိရပါတယ်။ ရန်ကုန်မြို့တော်စည်ပင်သာယာရေး ကော်မတီကနေ တရားဝင်ခွင့်ပြုချက် ရယူထားတဲ့ အဖွဲ့အစည်းတွေဟာ MPT နဲ့ Eager Communication Group နှစ်ခုသာရှိကြောင်း၊ တရားဝင်ခွင့်ပြုချက် ရယူထားတာမရှိဘဲ လုပ်ငန်းဆောင်ရွက်ထားတဲ့ ကုမ္ပဏီတွေ အနေနဲ့ ၃၁.၁၂.၂၀၁၇ ရက် နောက်ဆုံးထားပြီး ရန်ကုန်မြို့တော် စည်ပင်သာယာရေးကော်မတီထံမှာ တရားဝင်ခွင့်ပြုမိန့် လာရောက်လျှောက်ထား ရမှာဖြစ်ကြောင်း၊ သတ်မှတ်ကာလအတွင်းမှာ လာရောက်မဆက်သွယ်ရင် တပ်ဆင်ထားတဲ့ ကိရိယာတွေကို ဖြုတ်သိမ်းမယ့်အပြင် တည်ဆဲဥပဒေ၊ နည်းဥပဒေနဲ့ အညီအရေးယူ ဆောင်ရွက်သွားမှာဖြစ်ကြောင်း အသိပေးထားပါတယ်။

ရန်ကုန်မြို့တော် နေပြည်သူတွေအနေနဲ့လည်း တရားဝင်ခွင့်ပြုချက် ရယူထားခြင်းမရှိတဲ့ ဆက်သွယ်ရေး ဝန်ဆောင်မှု ကုမ္ပဏီတွေနဲ့ လုပ်ငန်းဆောင်ရွက်ခြင်း မပြုကြဖို့လည်း အသိပေးထားပါတယ်။ ဆက်သွယ်ရေးဥပဒေ အခန်း (၁၃)၊ ပုဒ်မ (၄၁) အရ “သက်ဆိုင်ရာမြေနှင့် အဆောက်အုံပိုင်ရှင် (သို့မဟုတ်) ယင်းမြေနှင့် အဆောက်အအုံ Right of Way ကို စီမံခန့်ခွဲခွင့်ရှိသူနှင့် ညှိနှိုင်း၍ ကာလသတ်မှတ်ချက် ပါဝင်သော နှစ်ဦးနှစ်ဖက် သဘောတူညီချင်ဖြင့် ဆောင်ရွက်ခွင့်ရှိသည့် နေရာတွင်ဆောင်ရွက်နိုင်သည်” လို့ ပါရှိတဲ့အချက်နဲ့သာ ဆောင်ရွက်ဖို့ ဆက်သွယ်ရေး ညန်ကြားမှု ဦးစီးဌာနက အသိပေးထားပြီးဖြစ်ကြောင်း ဆိုထားပါတယ်။

ရန်ကုန်မြို့တော် စည်ပင်သာယာရေး ကော်မတီအနေနဲ့ ရန်ကုန်တိုင်းဒေသကြီး အစိုးရအဖွဲ့ရဲ့ ကြီးကြပ်ကွပ်ကဲမှုနဲ့ ဆက်သွယ်ရေး လုပ်ငန်းတွေကို လုပ်ကိုင်နိုင်ဖို့ သက်ဆိုင်ရာဝန်ကြီးဌာနတွေ၊ ဆက်သွယ်ရေးဝန်ဆောင်မှု လုပ်ငန်းလိုင်စင် ရကုမ္ပဏီတွေနဲ့ ပေါင်းစပ်ညှိနှိုင်းပြီး ဆောင်ရွက်ပေးနေတယ်လို့ ထုတ်ပြန်ထားပါတယ်။

-ထွန်းထွန်း