ဆိုက်ဘာတိုက်ခိုက်မှုတွေနဲ့ မသက်ဆိုင်ကြောင်း မြောက်ကိုရီးယား ငြင်းဆို

ပြုံယမ်းအနေနဲ့ ဆိုက်ဘာတိုက်ခိုက်မှုတွေနဲ့ ဆက်စပ်ပတ်သက်မှု မရှိဘူးလို့ မြောက်ကိုရီးယား နိုင်ငံခြားရေးဝန်ကြီးဌာနရဲ့ ပြောရေးဆိုခွင့် ရှိသူတစ်ဦးက ပြောကြားလိုက်ပါတယ်။ ဒါဟာ ကမ္ဘာတစ်ဝန်းမှာ ဖြစ်ပွားခဲ့တဲ့ ဆိုက်ဘာလုံခြုံရေး ကျိုးပေါက်မှုတစ်ခုအတွက် အမေရိကန်ရဲ့ လူသိရှင်ကြားစွပ်စွဲမှုကို မြောက်ကိုရီးယားက ပထမဆုံး တုံ့ပြန်ခဲ့တာ ဖြစ်ပါတယ်။

“ဒီဆိုက်ဘာတိုက်ခိုက်မှုက ကျွန်တော်တို့နဲ့ ဘာမှမဆိုင်ပါဘူး။ အမေရိကန်ရဲ့ အဓိပ္ပာယ်မရှိတဲ့ စွပ်စွဲပြောကြားမှုတွေကိုလည်း တစ်ခုချင်းစီ တုံ့ပြန်ဖို့ မလိုပါဘူး” လို့ အထက်ပါ ပြောရေးဆိုခွင့်ရှိသူက မြောက်ကိုရီးယားရဲ့ KCNA သတင်းအေဂျင်စီကို ပြောကြားခဲ့ပါတယ်။

အမေရိကန်ရဲ့ စွပ်စွဲချက်က မြောက်ကိုရီးယားကို နိုင်ငံရေးအရ ရန်စမှုတစ်ရပ်သာဖြစ်ပြီး ဒါကို ပြုံယမ်းက လုံးဝသည်းခံနေမှာ မဟုတ်ဘူးလို့ အဆိုပါ ပြောရေးဆိုခွင့်ရှိသူက ပြောပါတယ်။

မေလကဖြစ်ပွားခဲ့တဲ့ ဆိုက်ဘာတိုက်ခိုက်မှုကြောင့် ဆေးရုံတွေ၊ ဘဏ်တွေနဲ့ အခြားကုမ္ပဏီတွေမှာ အကြီးအကျယ် ထိခိုက်ပျက်စီးမှုတွေ ဖြစ်ပေါ်ခဲ့ပါတယ်။

-နောင်နောင်
Ref: Reuters